Сәлемдеме

Сәлемдеме жастарға,

Зарым замандастарға.

Көкірекке ақыл, көзге ғибрат,

Жалынды талап, жаңа үміт,

Адал жүрек, ақ ниет

Жамандықтан қашқанға.

Жай таппаған көбелек,

Жапырағы жоқ қу терек,

Итке маржан не керек?

Су ағар ма аспанға?

Халық үшін жан қиған,

Қамқорлықтан ой жиған,

Сәлемдеме бұл сыйдан

Жарты жаңқа тастар ма?

Ақылы билеп, ой салып,

Қайғысызға қайсарып,

Асыл сөзге бой салып,

Көңіл көзін ашқанға.

Сөз орнына бөз беріп,

Бөз бергенін көз көріп,

Хабары болса өзгелік

Дұшпаннан да, достан да.

Қарыны тоқ, қайырымы аз,

Отбасында өзі мәз;

Шөлдеп жүрген қысы-жаз

Мыңың басын қосқанға.

Көңілмен бірге қол жетер

Жұрт қажеті мол жетер,

Білімдікті олжа етер

Сусап тұрған бостанға.

Сусаған су тапса мәз,

Сондай құрбым – өнерпаз,

Осы қайғы, осы наз

Жарамас па астарға?…

                                   1915-1916 жылдар.